Frå juryen si grunngjeving: «Øyehaug får prisen for sitt omfattande forfattarskap, og hennar viktige bidrag i ulike litterære sjangrar som ho tøyer og eksperimenterer med. Øyehaug fører eit solid og utforskande nynorsk, med utfordrande og absurde litterære framstillingar.»
Gunnhild Øyehaug (f. 1975) vaks opp i Ørsta og bur no i Bergen. Ho debuterte med diktsamlinga Slaven av blåbæret i 1998, mens den første romanen Vente, blinke kom i 2008 og inspirerte 2015-filmen Kvinner i for store herreskjorter.
I 2026 er ho aktuell med boka Elskarane mine på Kolon forlag.
Øyehaug er Årets festspeldiktar i Bergen 2026 og har blant anna fått Aschehougprisen (2026) Amalie Skram-prisen (2025), Nynorsk litteraturpris (2024 og 2008), O. Henry Prize for Short Fiction (2022), Prins Eugens Kulturpris (2010), Sultprisen og Doblougprisen (2009), Tanums kvinnestipend (2007) og Bjørnsonstipendet (2006).
Programmet for dagseminar om Øyehaug i Fjaler 25.9. finn du her.
Samlagsprisen er ein årleg pris som går til ein forfattar som skriv nynorsk, uavhengig av forlag. Prisen vekslar annakvart år mellom å gå til ein forfattar som skriv sakprosa og ein som skriv skjønnlitteratur. Prisen er på kr 50 000. Juryen: Gunnstein Akselberg, Ingvild Bræin og Erling A. Westgaard Flote.