Har ein forfattar krav på grunnstipend? Kva skil eit kulturpolitisk vederlag frå eit opphavsrettsleg vederlag? Korleis kan vi på best muleg måte forvalte kollektive vederlag? Korleis bør fordelinga skje for i størst muleg grad å oppfylle intensjonane som ligg bak bibliotekvedederlaget: at midlane skal stimulere til skaping av nye bøker? Dette var nokre av spørsmåla som vart stilt i forkant og under møtet. Poenget var ikkje å konkludere i løpet av dagen, men at styret skulle få flest muleg innspel og synspunkt til bruk i sitt vidare arbeid med dette fram mot eit eventuelt forslag til endring.
Tidlegare ekspedisjonssjef og departementsråd i Kulturdepartementet, Helge Sønneland, innleidde om bibliotekvederlagets historikk og skilnaden mellom opphavsrettsleg og kulturpolitisk vederlag.
- Eit kulturpolitisk vederlag blir fordelt som eit virkemiddel for å bidra til at nye bøker blir skrive, altså ikkje som vederlag for bruk av enkelte verk eller premiering for skrivne bøker.
- Eit opphavsrettsleg vederlag blir fordelt ut frå bruk eller tilgjengeleggjering av identifiserte verk.
Generalsekretær Mette Møller gjekk gjennom korleis kollektive vederlag frå Norwaco, Kopinor og bibliotekvederlaget blir forvalta av Forfattarforeininga i dag. Leiar i DnF, Sigmund Løvåsen, presenterte styrets tankar omkring dette og la fram nokre mulege modellar for endring av grunnstipendordninga som grunnlag for gruppe- og plenumsdiskusjon resten av dagen.
Møtet var svært nyttig for styret, som fekk eit godt bilete av spennet i medlemmenes syn på stipendfordeling og kva omsyn ein må ta ved ei eventuell omlegging. Styret vil i sitt desembermøte summere opp innspel som kom på medlemsmøtet og avgjere korleis dei skal arbeide vidare med dette.